鳥山。商號 (Closed)

鳥山。商號係走日系簡約裝修風格嘅台式 cafe，店入面坐位好少，所以通常都要排隊，我去嗰日好好彩，居然可以 walk in😁。必食嘅鎮店之寶台中大甲芋泥卷果然名不虛傳，出面嘅蛋糕軟綿有蛋香，入面嘅芋泥唔單止芋頭味道濃郁，而且口感綿密，仲食得出有芋蓉粒同絲，真心好食，最重要係唔太甜，絕對啱我口味。叫多杯 Dirty，呢杯雖然都唔錯，奶啡比例正常，不過外表就唔太 dirty，上枱嘅時候奶同啡已經混埋一齊，要扣分啦。值得一提係店入面好多旅遊書籍，其中以台灣為主題嘅最多，非常好睇，如果唔係出面有人等緊位，邊飲啡邊睇書，真係可以消磨成個下晝。