直燒和牛商店 (Moved) New Location

朋友約我去直燒和牛商店，聽個名以為係賣凍肉，原來係食燒肉嘅。餐廳入面環境唔算好大，又位處內街，但係中午時間都會座無虛席，可見佢嘅受歡迎程度。首先揀個小食，雞皮餃子總共有四件，雞皮炸得香脆，亦冇多餘油脂，入面嘅餡料亦都好味。然後店員就為我哋準備燒肉。首先會喺烤爐之上放上油脂，以牛本身嘅油脂預熱燒爐，更能保持原汁原味。手切鹿兒島黑毛和牛嘅雪花分布得非常平均，肉質好嫩滑，而且亦不失肉味，絕對值得推介。而呢度另一推介就一定係呢個吉列牛脷，唔單止價錢相宜，重點係無限輪迴，即係無限追加，大胃王一定啱食。兩個烤爐就可以同時調配燒烤兩款唔同燒肉。午市時段加$28轉套餐，就會有齊前菜、飯同飲品。紫菜月見飯有大量紫菜，再加埋生雞蛋嘅蛋汁撈嚟食，真係又香又滑。套餐同時會包括冷泡茶及沙律，喺熱辣辣嘅燒肉套餐之中加上清涼嘅感覺。