甘飯館 (Closed)

家族關係丶歷史淵源⋯什麼什麼的，統統放低，只當佢係一間新開小菜館，佢嘅食物其實幾滋味，環境丶服務亦令人滿意，3個人食$600，吹咗個零鐘水，幾抵。今次醒目book定枱，8:30pm黎到，餐廳接近full， 雖店子細細，好在3個老友相聚都俾張5人枱我，坐得舒服唔迫「硤」。食「子薑皮蛋」係指定動作，溏心皮蛋蛋黃「郎郎吓」，就好似同我講緊「come on baby！快d食我啦」，立即夾片最大片嘅子薑連同皮蛋，一拼塞入口，好味啊！其實⋯3件皮蛋我一個人都食得曬。 朋友介紹食鍋貼蝦（件計）。個底鬆脆，只略嫌燶咗少少，蝦膠咬落爽彈，沾沙律醬食，可去油腻感。金牌燒鵝（例牌）：皮香而不脆，皮肉中夾層脂肪，鵝肉有嚼勁而無渣。朋友建議食件連骨少鵝肉嘅，正正係我細個時喺廣州食燒鵝嘅味道，我搵咗你好多年你知唔知。燒鵝用五香豆塾底（其實我都唔知佢正確個名，不過細個時媽媽好鍾意買黎食）。碩大鯪魚球，新鮮熱辣，彈牙，有魚香，沾咸香蜆芥一齊食，讚口不絕。其實仲叫左個八珍豆腐煲，個豆腐幾好食，外酥內軟，係個餸偏濃味少少。有無人可以話我知佢個名係唔係叫「五香豆」定「豉油豆」？好滿足的一餐。