八沢 (霎東街) (Closed)

星期六同友人諗住去銅鑼灣行街 經過一間日本嘢就入去試下。見到黑松露忌廉系列似乎店裡比較出名嘅。咁我哋就叫咗個黑松露忌廉三文魚腩帶子烏冬。個忌廉湯底同平時食嘅唔同，質感反而較稀身唔會太杰。但食落又無溝咗水嘅感覺，忌廉味好出之餘又唔太膩。而且個湯飲落亦有好香黑松露味。有三大塊三文魚腩同帶子，兩款海鮮都好肥美新鮮，絕對無任何腥味。個三文魚腩肉質嫩滑，十分高質。而個面底則係用爽滑彈牙嘅稻庭烏冬，唔錯唔錯！另外我哋試咗個廣島蠔肉碎烏冬。呢個烏冬嘅湯底相比就較清，但係比個蠔帶出到個鮮味，而且一啲都唔鹹無好重味精咁，我哋都差唔多飲晒成個湯。88蚊有5隻肥美廣島蠔，一啲都唔腥，而且煮到啱啱好熟，肉質嫩滑。性價比超高。最後叫咗個紫薯金栗餅，佢個炸粉一啲都唔會厚，而且外酥內軟，個餡好足料，食到甜甜嘅紫薯夾雜住甘栗粒，令到佢更有咬口。而且個炸物唔會食到有油益味，抵讚。