麵屋一平安 (Closed)

八月廿一日, 又忍唔住嚟幫襯, 今次仲係一入到去即時有位坐,不過原來呢間嘢廿四號先正式開張, 我諗開張後應該要訂定位...今次我哋都係食噃個 lunch set, 先嚟又係沙律,都係好味, 點知食咗三分一, 畀隻蚊之仔幫襯咗我碗沙律.......我當然即時叫人換過啦!! 啲職員都好緊張, 立即收起碗沙律同道歉,轉頭又有位著黑色套裝既女職員, 應該係經理之類特登走埋嚟再向我道歉。好快就畀過第二碗我, 好采有影底相, 明顯見到係「兩碗」沙律呢~今次同事試咗豉油拉麵, 我試咗一啖湯底, 清清哋, 都唔錯。但都係自己個豬骨湯底好味啲, 夠香濃!今次試吓跟個迷你雞肉飯, 但見到個賣相有少少失望, 味道冇乜特別。 同時既咖喱吉列豬扒飯, 依然正!!另一個同事既迷你吉列豬扒飯, 今次個賣相好似差少少, 同埋同事話啲豬扒乾身咗少少喎~~ 大家都覺得咖喱飯最好食!呢度暫時係我最愛既拉麵店, 最鍾意佢哋啲服務真係超好!好希望佢 Keep 到水準之餘, 可以間唔中出啲新嘢, 咁我哋一定會長期幫襯啦! 更詳細資料及圖片請看 : http://hk.myblog.yahoo.com/joycewai616/