十二味貴陽牛肉粉 (Closed)

接咗honey收工，二人先停喺附近一家「十二味貴陽牛肉粉」食碗粉，之後再慢慢行返屋企食甜品。小店座位不多，地方亦頗為狹窄，室內都幾熱吓，近門張二人枱可算最為通爽。牆上簡單以七彩o既牛頭裝飾，好明顯餐廳主打食牛肉。由於空間有限，入座前食客必先喺門口收銀處落單。食店一如餐茶廳般不設加一服務費，餐具及醬油全為自助式。愛人要咗碗細啲o既「辣味紅油牛肉粉」加豆乾；話就話細碗啲，但隻湯碗肯定大過細佬個頭囉，$56 + $6份量都算幾勁。小肥胃口大啲，所以叫咗個包羅萬有o既「全家福牛肉粉」。嘩，隻碗差不多有XO仔個「八月十五」咁大，認真誇張！「全家福」不但碗大、湯多、米線足，入面仲有齊牛展、肉丁、牛肚等，就連雞蛋都唔少得，個人特別欣賞入面脆卜卜o既菜碎，$98碗真係未必人人食得哂，建議大家可二人先分一碗，唔夠先追加。猴年將近，臨行前店員仲送上雙封利是，內含優惠餐券，「吃好！喝好！」意頭真係好！