Dirty Skillet

Open Now

Now Closed

位處商場角落唔起眼，實際離地鐵站五分鐘唔使。店舖裝修精緻夢幻，有個好似迴旋形中庭，有大油畫同好多小裝飾。食物打卡一流，價錢唔貴，今晚揀咗個dinner set配甜品，兩個人都係五六百蚊度。 ✦ 經典俄羅斯鮮蝦薯仔蛋沙律 份量充足，蝦肉去殼、新鮮。好rich嘅蛋黃醬，食落creamy。 ✦ 蒜蓉牛油雞翼 兩隻啱啱好，外皮香脆內裡滑溜，蒜香味濃郁。 ✦ 新奧爾良Shake Shake 海鮮袋儀式感滿瀉，視覺嗅覺味覺享受。店員set張細枱喺隔籬，用大膠袋喺客人面前將海鮮同蒜蓉牛油shake均，再擺好盤上菜。上枱海鮮味撲鼻而來。海鮮包括龍蝦尾、扇貝、特大西班牙紅蝦、青口等，仲有西蘭花同粟米，樣樣新鮮、毫無冰鮮感，而且用盤暖住，一路食仲都係熱辣辣。 ✦ 芒果拿破崙朋友生日，特意嗌多個甜品。用迴旋木馬做底盤播住生日歌上，隔籬枱都忍唔住問可唔可以影相。拿破崙芒果味香濃，餅底酥脆，吉士醬滑溜。 另外嗌咗果茶同青提乳酸，同樣好睇又好飲。全餐飯有種幸福感，令人享受。