讚好台灣

Open Now

Now Closed

每次經過都見到大排長龍的人氣台式餐廳！我食過幾次，食物唔錯但唔算特別出色，而且價錢唔平，性價比唔算高。所以一直唔明點解佔兩個鋪位都可以咁多人排隊。不過我次次都係食麵，無試過肉燥飯或者便當，可能驚為天人？肉燥排骨乾拌麵 $55 賣相及味道唔錯，但麵的份量唔多。排骨炸粉跟肉可以分開，幸好炸得乾身，唔會好油膩。五味小茄子 $32 呢份小食都幾貴，淋汁加蔥花及木魚碎，無咩特別。夜市小香腸乾拌麵 $58 麻醬拌麵好食，不同小香腸得六片會唔會太少料！鹽酥雞大骨湯麵 $49 鹽酥雞唔錯，炸粉唔會太厚，不過個大骨湯講到用牛骨燉煮，不加味精，我飲落就似清湯，以後唔會揀。以上麵食午市時段平一蚊，配熱飲或加$4配凍飲，其他時段凍飲加$6起。最近發現原來下午茶幾抵食，$34有主食四選一（圖中: 小碗麻將乾麵）配小食八選三（圖中: 逢甲鹽酥雞，夜市小香腸，椒麻牛肚絲）仲配熱飲，凍台灣奶茶加$3，外賣加$1，$38抵食好多！雖然個麵得幾啖，但小食份量都算多，有驚喜，不過建議打電話叫定去拎，因為我去拎果陣見到好多人排緊隊等落單。