佐賀山田 · 涮涮鍋 (Closed)

前幾日去完呢間位於太古嘅「佐賀山田」一人一鍋火鍋放題店，整體用餐體驗良好，同大家推介下～ 餐廳位於康怡商場裡面，連接地鐵站、非常方便。餐廳裝修雖然簡簡單單，但檯與檯之間唔會太窄，喺火鍋放題店裡面算係頗舒服嘅！餐廳呢期做緊呢個主打「黑安格斯牛板腱」cross over「廣島蠔味噌湯底」嘅主題（$249），咁啱兩樣都係我嘅最愛，梗係要試下啦！另外仲可以試埋其他6種肉，當中嘅「USDA Choice牛肩肉」同埋「美國CAB 牛肩肉」都係牛魔王回本之選！啲牛肉攞上黎就知道好新鮮，牛肉同脂肪比例唔錯，所以好好食！而啲廣島蠔好鮮味爽口，亦令到湯底好甜！呢度嘅丸類、蔬菜都係喺出面任攞，擺得好整齊易睇。值得一讚係佢哋啲丸類有個蓋，感覺比較衛生！飲品選擇都好多，比較驚喜嘅係呢度有OOHA無糖汽水，便利店賣一罐都幾貴架！甜品有個專門甜品櫃擺，裡面有啲泡芙、蛋糕仔，但我最後都係俾呢個主打日本雪條嘅雪糕櫃吸引左。佢地嘅明治雪條任食，好正呀！呢間火鍋店食物高質，價錢合理，值得一來！