海南

Open Now

Now Closed

同朋友去完堅尼地城魯班廟下面條長樓梯影相，打卡。之後見到間「海南」，個餐廳名喺社交平台啲堅尼地城街坊群組見過，決定試吓。餐廳外圍擺放咗些花花草草，雖然係假花假草，但感覺又幾溫馨。餐廳內部面積不算大，主要以深色木系裝飾，舒適企理。諗左好耐都揀唔到食去骨海南雞定紅燒狀元蹄好，點知店員介紹$83可以雙拼，最後就點左個雙拼！到上菜一刻，見到原來除咗海南雞同元蹄外，仲有菜心，擺盤都算幾好，加上獨立一碗黃飯同冬瓜湯。至於醬汁方面，有一碟三色醬，入面分別裝有甜醬油，姜蒽油同酸辣汁。仲有一碟汁，問店員先知原來係元蹄汁，佢話個元蹄汁唔淋上元蹄係避免影響到海南雞個原味，呢一點好細心，值得一讚！海南雞嫩滑有雞味，雞皮嘅油脂亦晶凝通透，配埋個酸辣醬，更加開胃更加爽口。個黃飯色澤金黃，粒粒分明而且好香乾蔥同蒜蓉味。元跡肥瘦參半，食落夠淋而且好香藥材味。菜心就無特別，不過不失。最後個例湯應該唔係味精湯，清新冬瓜幽香加上淡淡元貝鮮甜，正！總結：性價比高，值得下次再試，店員特別親切。