五要素食堂 (Closed)

難得天氣咁好，知道The One依間餐廳有得坐室外，就簡佢去enjoy下啦。室外地方配置十分令人舒適，以木為主調，一坐低已經令人暫時忘記工作上煩惱，人流唔多所以枱與枱之間有一定距離，更加relax。今次叫左lunch set，包埋濃厚男爵薯仔沙律同自家日式洋蔥湯，更加可以用$25去加甜品，依個價錢喺尖沙咀好難搵到！🐄燒美國黑毛和牛丼($78)黑毛和牛係薄切，燒得好好食，唔乾唔韌，入口輕輕一咬就已經可以吞落肚，好有驚喜！最鐘意佢地有大量火箭菜喺入面，一口和牛一口菜，女士們唔洗驚油膩！本來以為無乜醬汁，但原來係加咗喺飯面，微咸醬汁同黑毛和牛好夾，撈埋飯食更加促進食欲，但唯一覺得要改善之處係飯粒有點硬。🐓愛知大葉燒雞肉丼拼青森溫泉玉子($78)因為友人唔食得蛋，所以蛋另上。溫泉玉子上有柚子皮，好清新，依啲細節位都做得好好。（紫菜量多到嚇一跳）雞肉一入口已經食得出「炭燒」嘅惹味！雞皮燒得香脆，雞皮亦無燒過火，仍然保持嫩滑juicy。燒肉汁份量亦岩岩好，唔會令到成個丼好乾。男爵薯仔沙律表面有少少芝士碎，更加突出沙津醬嘅味道。自家日式洋蔥湯煮到洋蔥好軟好軟，雖然有少少咸但確實係日式洋蔥湯嘅味道呢。