古早牛肉麵 (Closed)

古早牛肉麵都幾出名，位於深水埗，地鐵站行幾分鐘就到，都幾方便。同一條街都有好多食店，競爭好激烈啊，不過今晚接近8:30pm 入面都唔少人。Menu都幾多選擇，仲有好多小食例如甜不辣，蛋餅，由於我一個人淨係叫左牛三薈，即係牛腱、牛筋同牛肚麵，仲有一杯蜂蜜蘆薈烏龍茶加珍珠。首先，講下個麵條。麵條非常有咬勁，啖啖都係彈牙。之前特登睇食評d人話好淋，可能水準飄忽d？個湯底喺牛骨熬成，有好濃嘅牛肉香味，仲帶有啲甜味，再香辣多少少就正啦。牛腱、牛筋同牛肚。佢哋嘅牛腱好腍，喺口中好易化開，同時帶有淡淡嘅牛肉味，同埋好大舊啊！牛筋方面，經過長時間炖煮，變得非常腍滑，口感好好。至於牛肚就正常發揮，有彈性。飲品我叫左蜂蜜蘆薈烏龍茶加珍珠，非常解渴。蘆薈同珍珠勁大杯，特別珍珠好彈牙，非常好味。