哈妃 (Closed)

天后一向都多甜品鋪，有朋友話我知呢間甜品好精緻，同其他o個幾間街坊feel好唔同，即刻去試！甜品未到，老闆娘就同我地講食甜品送花茶，有兩款 ，桂花烏龍同玫瑰花，咁就一樣一杯每枱仲有朵鮮花擺設～哈妃蛋黃楊枝甘露 $68造型比平時d楊枝甘露有心思，上面好似有一隻荷包蛋咁，店員話『蛋黃』裡面係芒果汁，白色o個塊係蛋白，要用支牙籤吉穿個『蛋黃』，等d芒果汁流落去，再整碎塊蛋白，撈埋下面啲芒果粒同柚子肉，再到埋旁邊d『甘露』，好香滑，生果好鮮味！ 之後再食埋d新鮮芒果粒～爽！迷你雪糕漢堡 $68一上枱就忍唔住影相呃like! 唔係唔影呀，咁靚o既擺盤！ 中間有三個迷你雪糕漢堡，其實係泡芙夾住水果粒 + cream + 雪糕磚，分別雲呢拿、朱古力同士多啤梨味雪糕，泡芙好脆，加上裡面雪糕，好味～左邊係炸南瓜條，煙煙韌韌，有d似過年食o既煎南瓜糯米餅！ 甜甜地，點d士多啤梨醬，酸酸甜甜好好味～ 右邊有d水果，老闆娘話係青印提子、巨峰提子、新鮮無花果等，淨係青印提子已經夠矜貴啦！ 果然係同周圍街坊甜品鋪唔同feel，樣樣都咁精緻，唔講以為去咗高級酒店裡面食甜品！ 值得一試！