Ocio (東港城) (Closed)

人氣 Café「Ocio」喺香港紮根多年，一直深得粉絲歡心。之前幫襯過旺角分店，覺得食物水準唔錯，今日有事要嚟坑口 ，晏晝就順道去東港城分店吃頓午餐。餐廳裝潢走木系小清新路線，門口嘅純白外牆十分亮眼，店內空間寬敞，環境舒適，加上室內嘅畫作同植物裝飾，超適合打卡！餐廳主打多國菜、甜品、日式刨冰及全日早餐等。先食鹹、後食甜。點咗一客和風牛肉丼飯 ($78)，午餐配是日餐湯及 $33 或以下飲品。南瓜湯打得好 Creamy，南瓜味夠，配埋忌廉感覺又滑又綿密。凍檸茶酸度適中，清爽又解渴！牛肉香口嫩滑，肥瘦合宜，份量不少，醬汁完全滲透晒入牛肉內，加上淋上惹味牛肉汁的珍珠米飯，口感甚佳！+$19 可配精選蛋糕一件，揀咗件檸檬芝士餅，餅底好脆口，檸檬味相當重，非常夠酸，開胃又唔漏。另外再加多咗客原味蜂蜜-鑄鐵鑊仔法式吐司 ($75) 配朱古力雪糕 ($10)，吐司超級大份，以鑊仔盛上，面頭鋪滿杏仁脆片，賣相一流！將香濃嘅朱古力雪糕放上面，再用刀把吐司切開，外層脆卜卜，裡面很濕潤，入口充滿雞蛋同法國忌廉香味，吃時淋上蜜糖，更添美味。