臺坊 (加拿分道) (Closed)

今日同朋友去尖沙嘴，厚福街出名多野食！我地見到呢間台灣野，覺得款式幾多又唔貴就入左去食。我我地每人叫左一個主食再叫野飲同小食share。我叫咗紅燒牛肉麵，佢個湯底好濃好入味，而且除左牛肉好淋之外，佢d白蘿蔔同紅蘿蔔都好入味，D麵都幾爽口。朋友個鹽焗雞絲肉燥飯啲鹽焗雞味都幾出，同埋你見到啲雞絲都幾多份量，加埋肉燥同滷蛋真係好惹味！我哋兩個share咗個吞拿魚同粟米台式蛋卷，佢個蛋餅煎得好煙韌，入面嘅吞拿魚茸都好多，加埋甜甜既粟米好好食！跟住我哋兩個怕飲唔晒兩杯野飲，所以叫咗一杯嘢飲share，我哋叫咗個小麥胚芽奶茶。佢杯嘢飲真係好熱，加上裏面真係有粒粒胚芽再配上奶茶嘅香味，飲完真係有好窩心嘅感覺。整體來講，係一個好滿足嘅下午茶，食到好飽唔貴之如食物質素都幾唔錯。