Video
Read full review
2020-01-25
1750 views
依日day off同呀媽去荃灣行街街，順便食個晏。呀媽之前話想食馬拉菜🇲🇾，我記得聖誕行過荃新天地見到有個成兩層樓嘅廣告係蝦麵店XD，嗰時已經bookmark咗。由於無食到早餐，我哋就準備大擦一餐😋。我哋兩點到去到，餐廳多多地人，可能都叫做係lunch水尾，但咁啱侍應得返收銀嗰位，變咗佢一腳踢。不過佢落單都好清晰好快手，仲勁清楚咁講每樣食物加配係加幾錢👍。Lunch套餐包咗一碗麵(比淨叫一碗麵嘅份量細少少)、一樣小食同一杯飲品；另外每樣額外嗌嘅小食加$16。餐廳仲有一個全日優惠餐牌，都好鬼抵。每樣食物都唔使原價叫，變相嗌下嗌下就嗌到成枱嘢🙈。辣味蝦湯底：L1蝦肉肉片麵($68)，🦐蝦湯底真係好濃蝦味，好香，估計應該用咗好多蝦殼煲；而食落又唔會重口味喎，唔錯。不過話明係辣味蝦湯，我預計會辣啲🌶，如果鍾意食辣嘅就可能會覺得爭少少。蝦肉係片開一半咁上，而肉片係腩肉，份量都唔少。麵底我就揀咗摻摻，即係米粉加油麵。咖哩喇沙湯底：L5海鮮麵($78)，呢碗係呀媽嗌的，我試咗啖個湯都幾濃幾香，唔辣的，但🥥椰味可以重啲。另外，我認為呢碗搭配淨米粉比起摻摻會更好食，因為更索湯。海鮮配料有一隻蝦、一隻青口
依日day off同呀媽去荃灣行街街，順便食個晏。呀媽之前話想食馬拉菜🇲🇾，我記得聖誕行過荃新天地見到有個成兩層樓嘅廣告係蝦麵店XD，嗰時已經bookmark咗。
由於無食到早餐，我哋就準備大擦一餐😋。我哋兩點到去到，餐廳多多地人，可能都叫做係lunch水尾，但咁啱侍應得返收銀嗰位，變咗佢一腳踢。不過佢落單都好清晰好快手，仲勁清楚咁講每樣食物加配係加幾錢👍。
Lunch套餐包咗一碗麵(比淨叫一碗麵嘅份量細少少)、一樣小食同一杯飲品；另外每樣額外嗌嘅小食加$16。餐廳仲有一個全日優惠餐牌，都好鬼抵。每樣食物都唔使原價叫，變相嗌下嗌下就嗌到成枱嘢🙈。
辣味蝦湯底：L1蝦肉肉片麵($68)，🦐蝦湯底真係好濃蝦味，好香，估計應該用咗好多蝦殼煲；而食落又唔會重口味喎，唔錯。不過話明係辣味蝦湯，我預計會辣啲🌶，如果鍾意食辣嘅就可能會覺得爭少少。蝦肉係片開一半咁上，而肉片係腩肉，份量都唔少。麵底我就揀咗摻摻，即係米粉加油麵。
咖哩喇沙湯底：L5海鮮麵($78)，呢碗係呀媽嗌的，我試咗啖個湯都幾濃幾香，唔辣的，但🥥椰味可以重啲。另外，我認為呢碗搭配淨米粉比起摻摻會更好食，因為更索湯。海鮮配料有一隻蝦、一隻青口、魷魚同蟹柳，正正常常啦，但最後樣料其實可免😅。
白胡椒肉骨油條(細份)($42)，依樣係全日小食優惠，佢同平日嘅肉骨茶唔同，首先唔係深色，第二係無乜藥材味。我覺得味道幾唔錯，啱我口味(利申返我食得鹹)，個湯配埋啲排骨好啱送飯。隨湯奉送嘅油炸鬼係切粒上的，但比較硬，非常一般，不過佢只係配角啦😜。
跟午餐嘅小食我哋total要咗四樣，哈哈，好痴線，但好彩都食得哂。A.馬來沙爹雞髀肉串(兩串)：呢個同我想像中有啲分別，其實即係同普通雞串無異。不過我欣賞佢個沙嗲醬，好惹味好多花生粒🥜。
C.五香脆炸豆腐豆卜(細)：雖然係細，但份量其實都唔少，每樣都好多粒，但外皮有少少乾，點醬食會好啲。
D.脆香魚皮：我以為得幾片，點知係成大碟，魚皮好大嚿，15cm都有！！！食落好脆👍。
H.蝦麵店特製亞參脆多士：多士有三塊，薄薄地其實幾好，因為係小食嘛。亞參似果醬啲friend，酸酸地，幾開胃，不過唔似甜品哈🤣。
真正嘅甜品方面，我哋要咗摩摩喳喳(+$18)，即係渣渣啦，用鐵碗仔上，幾得意。味道唔太甜，都幾好，用咗好多料，包括蕃薯🍠、芋頭、香蕉🍌、紫薯等，所以顏色係紫紫的💜。
最後就係飲品，我哋都轉咗特飲(+$10)，分別係冰糖檸檬薏米水同青檸梳打，前者清清地ok，後者除咗青檸外，仲用上柑橘仔，所以特別香。
總括嚟講，呢餐真係飽到上心口，哈哈，一次過食咗各式各樣嘅馬來西亞食品，有啲平日真係比較少食到，味道亦都唔錯。餐廳最好嘅地方係有好多小食提供，而且每份細細哋，就算兩個人都可以嗌多幾種試下👍，價錢整體嚟講我覺得好相宜(午市仲要免加一啊)。環境正正常常，二人枱就未必放得哂啲食物，裝修有啲窗框咁，馬拉特色？最後，行去收銀處埋單時見到餐廳原來係咁撐香港人💛🇭🇰。
Post
