Video
Read full review
2022-02-03
166 views
星期日同阿爸阿媽喺銅鑼灣Shopping完，就食埋飯先返屋企。希慎對面之前有個Food Court，但執咗之後一直圍封裝修，直至最近終於開返啦❗️。我哋特意到訪，發現原來上址有幾間餐廳落户，而「巷仔見麵館」就係我哋今日開餐嘅地方。由於我哋全日未食過嘢🙈，五點食呢一餐就當齊係中午晚三餐，因此大胃王上身，食到飽晒。火炙芝士雞扒包(特價$20)，餐廳做緊推廣活動🈹，凡惠顧任何食品就可以用優惠價加配雞扒包，廿蚊包邊度搵，仲要咁大個呢！🍗炸雞扒大大塊兼厚切，外層酥脆，肉又夠嫩；配上沙律醬生菜同芝士有中和嘅作用，當中更不乏火炙燻香🔥。麵包亦意外地唔乾身，成個包各個部份都處理得好好。清湯牛魔王幼麵($54)，我超級鍾意食生麵🍜，鍾意嘅程度係日日食都得，所以我對呢樣食物亦好有要求。呢度嘅麵條非常出色，口感爽彈，唔重鹼水味。同時，湯底亦係精華所在，牛味濃郁惹味，但亦能保持清澈，而且最重要係夠晒熱。🐮牛三寶包括肥牛、牛腩同牛丸，餸料就屬正常水平，但份量唔孤寒。無骨海南雞($108/半隻)，本身想食海南雞飯，但阿媽驚太飽所以就轉戰淨雞🐔。海南雞去骨，食用方便，雞皮爽口，肉質嫩滑，但有少少可惜嘅係因為隻雞比較瘦
星期日同阿爸阿媽喺銅鑼灣Shopping完，就食埋飯先返屋企。希慎對面之前有個Food Court，但執咗之後一直圍封裝修，直至最近終於開返啦❗️。我哋特意到訪，發現原來上址有幾間餐廳落户，而「巷仔見麵館」就係我哋今日開餐嘅地方。
由於我哋全日未食過嘢🙈，五點食呢一餐就當齊係中午晚三餐，因此大胃王上身，食到飽晒。
火炙芝士雞扒包
$20
10 views
0 likes
0 comments
清湯牛魔王幼麵
$54
8 views
0 likes
0 comments
無骨海南雞($108/半隻)，本身想食海南雞飯，但阿媽驚太飽所以就轉戰淨雞🐔。海南雞去骨，食用方便，雞皮爽口，肉質嫩滑，但有少少可惜嘅係因為隻雞比較瘦，唔夠厚肉。伴旁嘅醃蘿蔔絲微微酸，開胃。三色醬汁還好，大路配搭。
麻辣雲吞($29/4粒)以及泰好味萵筍絲($20)，🥟雲吞大大粒，餃皮又薄又滑，入面包裹住原隻鮮蝦，真材實料🦐。麻辣味遠比想像中辣，都OK，但麻味如果強啲會更佳。💚萵筍絲本身無問題，不過個人就唔太鍾意泰式風味，佢係酸辣鳳爪嗰隻汁，酸度偏高，川式麻辣或許會好啲。
脆脆鳳尾蝦多士
$37
8 views
0 likes
0 comments
仙氣雪山六寶冰($38)，餐廳連甜品都撈埋，款式涵蓋台式刨冰同傳統糖水等，價錢比起甜品舖相宜得多，就例如豆腐花同湯圓$1X就有交易😳。我哋要咗六寶牛奶冰，賣相好澎湃呢，但由於冇乾冰，所以缺少咗仙氣嘅部份，哈哈。🍧刨冰嘅牛奶味唔算突出，反而係靠雪糕嘅味道，其他配料仲包括三色芋圓、紅豆、湯圓同仙草等。咁嘅價錢同份量難以再作批評。
仙氣冰鎮奶茶
8 views
0 likes
0 comments
題外話，呢度環境幾舒服，樓層面積大，座位闊落，衛生情況良好👍。雖然都係食茶餐廳嘢，但佢比連鎖店或地舖好坐得多，而且裝修其實仲幾有心思添，牆畫好有地道特色。
總括嚟講，我會形容今餐係性價比高嘅港式風味大餐😋🇭🇰💯。每樣食物出品味道都唔錯，質素平均。餐廳定價唔貴，甚或直接用抵食來形容都得，唔好忘記呢度係銅鑼灣區啊。下次行開銅鑼灣，我哋都會再嚟幫襯！
Post
