Red Lobster (Fashion Walk) (Closed)

今日放假專程嚟到呢一間龍蝦專門店食午餐， 最初係畀佢嘅優惠吸引而來， 因為佢哋而家點一款龍蝦主菜， 就可以加一蚊食牛扒。 但當入到去見到佢個set lunch menu， 覺得仲抵食， 因為有埋餐湯和嘢飲。 今次試咗波士龍蝦尾配椰子薑飯和牛扒飯， 牛扒飯嘅肉眼扒肉質細嫩， 夠牛味， 飯用咗五穀米， 配菜有燒蕃薯、 西蘭花和椰菜花， 食完之後覺得自己健康曬， 大滿足。 另外一個主菜就麻麻地， 龍蝦有啲韌， 椰子薑飯冇薑味。 不過呢度啲服務好細心， 服務員主動過嚟問我哋啲嘢啱唔啱食， 我哋照實同佢反映咗意見， 職員喺我哋埋單之前仲送咗件芝士蛋糕畀我哋食， 呢間餐廳雖然係美國餐廳， 不過出奇地件芝士蛋糕唔係好甜， 而且好好食， 呢個真係一個小驚喜， 完全冇諗過佢哋嘅service recovery做得咁好。 另外佢哋唔收加一， 仲要車打芝士鬆餅任食，讚！