壹．咖啡店 (Closed)

星期六有兩樣野要喺油麻地做，不過appointment時間相隔一個鐘，中間就喺附近搵下地方食lunch。行過呢間輕工廠風既小店，門外有幾棵小植物，咁岩一陣陽光灑過，好有生命力既感覺。再睇睇餐牌，好抵食喎，有湯有包有主菜有飲品，都係四十幾至六十幾蚊。我叫左//香煎墨西哥豬扒配意粉//、紅湯、凍檸茶少甜少冰。紅湯係茄膏味濃o個種，材料有甘荀粒、西芹、椰菜等，蒜蓉包係軟包，蒜蓉牛油搽得均勻，整得幾用心。檸茶茶底濃，檸檬片有三四塊，都唔錯。檯面既圖案好岩影相好上鏡！香煎墨西哥豬扒配意粉份量比想像中多，豬扒有兩塊，大致上都煎得幾淋，係比較瘦既部分硬少少，整體黎講都幾有豬味，唔會係雪藏豬扒既感覺。意粉係茄汁撈既，雖然唔濃味，但每條都掛汁。配菜製作幾認真，有青瓜、翠肉瓜同甘荀bb，有加左香草架。我坐近門口，望住綠油油既植物同埋街景，都幾寫意。埋單$44，食物質素絕對對得住價錢。雖然全店只有兩位女侍應，但都算照顧周到，亦都同客人有傾有講，氣氛唔錯。