Cow Bean (TKO Gateway) (Closed)

有日經過見到坑口呢一間餐廳好多人排隊，原來係Pokka Cafe旗下既餐廳，有鐵板牛扒、炒飯或者烏冬套餐，價錢都幾親民。所以搵日放工就黎試吓啦，夜晚七點半都有20幾人排緊隊，建議如果想食，最好早少少入座。我叫咗一份紐西蘭肉眼$135（300g)套餐加$29，仲包一個意粉、野菜沙律（另加$10配煙三文魚）、韓國柚子蜜。沙律菜新鮮爽甜，沙律汁酸酸甜甜,幾開胃。牛扒嚟到嘅時候係三至四成熟，可以因應個人喜好再加熱。建議首先將牛扒切開，睇一睇個生熟程度。如果生熟程度滿意，就可以放喺啲配菜上面，加上醬汁就食得啦。牛扒非常厚身，牛肉味濃，肉質有嚼勁。每一啖都好好食，呢一個價錢來講性價比甚高。鐵板豚肉炒烏冬$78另加薯條$12豚肉好香，讚岐烏冬配上香菇、椰菜、粟米等等仲有燒汁，有口感得來又幾惹味。有少少意見就係烏冬比較容易癡底，個鐵板可以唔使咁熱。薯條炸得香脆，又不會太燶，好滋味。侍應服務態度好好，會好細心咁解釋餐牌同埋食法，服務迅速，值得一讚。