倪姐泰國美食 (Closed)

九龍城又名小泰國，除左有唔同既泰國餐廳座落呢度，每年都會好似泰國新年咁搞一個小型潑水節，所以成日都好鐘意約朋友黎九龍城食泰菜。今日黎到「倪姐泰國美食」，一入去就有位唔洗等，正！我地叫咗叫左燒豬頸肉、鮮蝦炒金邊粉、咖哩牛腩再加薄餅。*逢星期一至五叫滿$300就可以以$1加點泰國特色小食、甜品或明爐烏頭!!抵!!一直鐘情食金邊粉既我，基本上每次食泰國菜都會點炒金邊粉，可以話係百吃不厭，今次黎到「倪姐」，當個金邊粉一黎到就俾佢個外表吸引左，餐廳用蛋絲做左個網，聞到好香好吸引，即刻撈勻黎食，一口包含住金邊粉、豆腐乾、蛋絲、芽菜、韮菜、花生碎，真係好滿足！！燒豬頸肉呢個都唔錯，望住燒得剛好既豬頸肉，沾上特製泰國醬汁，令到油脂感好重既豬頸肉解一解膩～～咖哩牛腩，一直以來我都對咖哩只限於日本甜咖哩同印度偏辣既咖哩，而呢一款完全可以令你一試愛上，我覺得佢似係將日本咖哩混合印度咖哩然後加椰汁，牛腩煮得好熟稔，加上新鮮蔬菜作配菜同埋足夠送飯既醬汁，令我地都一試愛上，值得大家叫黎食！一定要加埋薄餅啊，唔好浪費D咖喱汁。我地仲試咗杯椰皇沙冰同珍多冰，椰皇沙冰好特別啊，椰味勁重，珍多冰入面仲有D芒果乾，好足料！