姨婆瑪麗 (Closed)

人人都知道春秧街係福建街，但後街有一間唔起眼嘅小店，一直做馬拉怡保菜式，老實講一直見佢生意麻麻，以為佢都捱唔住，今日去到見佢都仲有開門，所以坐低又食個餐。今日試佢個肉骨茶，個肉骨茶嘅賣點…係好平！之前我食過「數碼數碼」嘅肉骨茶，食係好食，但係淨係碗肉都已經要$100 ，未計白飯，油炸鬼，價錢真係幾貴，呢度就只係60幾蚊就有一份肉骨茶餐。肉骨茶比較重藥材味，唔係好胡椒，肉來講都算有返咁上下，唔多唔少。咁晚餐一場嚟到，就叫多咗一份串燒。今次叫咗豬肉串燒，佢嘅晒啲汁係有啲同其他舖頭唔同，唔可以話佢係好味或者唔好味，因為根本係另外一款醬，比較偏甜。咁豬肉就比較油，我估係燒嘅時候掃得比較多油，咁食落上嚟味道都還可以，都係果句，串燒$14嚟講的確係好平。最後，帶返個頭盔，食就真係唔算好食，不過呢個價錢，可以食到呢個份量，又至少比起快餐店高嘅質素來講，的確係幾抵，希望下一波疫情之後佢都仲捱得住啦。