Food Garden ETC (Closed)

有人終於考完試就帶佢去d2玩，玩之前行吓街睇吓有咩食，見到呢間餐廳坐得都幾舒服，最鍾意可以坐梳化， lunch價錢亦都唔貴，所以就嚟試吓。食lunch好處就係可以有沙律/湯同埋有冰茶，小朋友點咗大蝦蟹肉意粉，見到啲蝦好大隻，蟹肉配埋意粉一齊食，食入口有啲蒜蓉香味，海鮮嘅鹹鹹地味道，好味到小朋友可以自己食晒一碟。我就叫咗牛肩肉，牛肩肉比較有口感，牛味會較濃郁，五成熟食入口唔會好韌，我鍾意呢個口感，百幾蚊食到一塊扒，唔係好多地方有，因為本身牛扒唔跟薯條，我哋就加咗$38配咗份黑松露薯條，薯條新鮮炸起，外脆內軟，黑松露在薯條表面，味道唔算太出，不過都幾香。最後叫咗個心太軟俾小朋友，流心嘅朱古力小朋友又點會唔鍾意。我自己就點左咖啡雪糕，開頭以為只係一杯普通嘅咖啡雪糕，原來係一杯Espresso加雲呢拿雪糕，我第一次咁食，原來非常之夾，雪糕有濃濃嘅咖啡，食晒杯雪糕之後，杯咖啡味道又剛剛好，真係極級好味。食完之後小朋友見到呢度有聖誕大餐，見到價錢同埋食物都幾吸引，聖誕節又可以多一間餐廳選擇呢。