Green Waffle (Closed)

午巿上面書打卡送指定味道雪糕一球，加落跟餐窩夫一齊食都幾吸引。但今餐無享用呢個優惠，因為食到尾段已好飽，唔想嘥嘢。飽，在於叫咗個脂肪度爆棚的牛排粒薯粒鑊仔（個名超古怪），見到實物後，幫佢改叫鑊仔牛排粒脆薯配流心蛋。份量唔大，脆口嘢自然油份高，越食越肚脹。加隻流心蛋一齊食，入口冇咁油膩。牛排粒生熟度剛好，另混入香菰做配料，令賣相豐富啲，望落唔覺牛排粒特別少。為咗平衡呢個重口味餐，叫多個煙三文魚忌廉芝士卷伴粟米及薯仔沙律。菜如其名，一個大碟上放齊呢三樣食物。粟米多汁易刨（冇錯，係用刨的方式去食）；三文魚卷味道略寡，魚肉色水頗淡，加多啲忌廉芝士同青菜就好喇。跟餐甜品半份窩夫的外層有啲硬，切開見唔係厚身版，同咖啡弄的出品正好相反，味道正正常常，都係鍾意食厚身窩夫多啲。餐飲熱咖啡味道好，配窩夫食最夾。比食物更值得欣賞係店員服務細心周到，讚。