大呷台灣 (Closed)

大呷台灣，位於中環威靈頓街，過年諗住食得蘿蔔糕多，嚟食下台灣嘢，點知完全畫伏，個人認為屬於恐怖難食，慎入。首先，$83炸豬扒新竹米粉，塊炸豬排完全無味，外脆無味肉死實實，碗新竹米粉就更精彩，完全無味，係連個湯都真係無味，食左一啖就放棄。$83真係屬於災難級搶錢，自己煲碗公仔麵都一定好食過呢碗野。仲話係台灣新竹米粉？？$78古早味蚵仔煎，漿粉多過料，細細隻迷你蚵仔，但連普通台灣街邊車仔檔都好過呢間，反轉個蚵仔煎就見到完全無料。一慘再慘。$58肉燥飯伴糖心鴨蛋，肉燥飯味道算極普通正常質素，但隻糖心鴨蛋係冰凍的，注意冰凍的，應該剛剛係廚房雪櫃拎出嚟。飲品方面就更加精彩，叫左一杯凍椰香古早珍珠奶茶，拎出來個陣係熱椰奶加冰，杯冰溶晒之後，杯野係無味，最奇怪係明明係珍珠奶茶，但杯野係無奶茶，實在差到忍唔住叫店員換過杯普通珍珠奶茶就算。伏仲未完..$33桂花烏龍冷泡茶，餐廳比一個茶包+凍水，完。總結，$308食左一肚火，一生不會再嚟。