嵐山日本料理

Open Now

Now Closed

自問少出外食日本料理，所以甚少行入黎棉登徑搵食。一直以為呢條街到夜晚酒吧營業先聚人氣，原來中午都有唔少人專情黎食日本菜。今日同女友行開呢頭，一轉入棉登徑就見到嵐山招牌，門面裝潢實而不華，全店裝飾以木系材料為主，驟眼睇唔算起眼，卻俾人一種沉實感覺。呢度午市定食款式唔算花巧，都係食魚生飯同牛肉鍋之類。由於小弟鐘意食油脂甘香既魚生飯，所以決定單叫「拖羅丼」(午市定食$148)。餐牌寫呢度既「拖羅丼」即係中拖羅加萬花拖羅蓉。黎到想食大拖羅朋友可能要散點壽司了。定食除左味噌湯、野菜沙津、茶碗蒸(日式蒸水蛋)，仲有一小碟脆卜卜銀魚仔同牛蒡。所有小碟份量都點到即止，好有料理feel。拖羅丼雖然只係用中拖羅，但已經見油脂滲透落珍珠米，飯味好甘香。食完大啖拖羅蓉見個口有d油，食番片醃黃蘿蔔就啱啱好。食完正餐仲送埋豆腐味雪糕，雖然食埋甜野有d饇，要飲多兩杯綠茶解膩，不過一餐半餐就冇緊要啦，最緊要好食。