agnès b. Café LPG (Closed)

因爲我有一張＄５０現金券兼一張免費咖啡同迷你蛋糕券，於是同老公嚟呢間cafe試吓。我哋大約１：４０到達，餐廳約７，８成滿。窗邊有落地玻璃，鍾意望街嘅人就啱，但噚日中午超過２０度，有啲熱，於是我揀冇陽光嘅梳化位坐。主食選擇只有３款，得菴列或意粉，反而三文治，蛋糕，飲品款式較多。我哋叫咗２個菠菜煙三文魚意粉，２杯冇咖啡因花果茶，１件cheese cake，１個凱撒沙律。凱撒沙律都算大兜，連麵包碎都好味，面頭有芝士薄片增加香味。主菜菠菜煙三文魚意粉，啲三文魚好新鮮，個白汁幾多菠菜茸，幾creamy，鹹味同份量適中。蛋糕係憑券送嘅，原價＄３６。賣相幾靚，面頭有一片白朱古力，中間有一點銀色裝飾，不過真係好迷你，兩三啖食完，＄３６就唔值啦。件蛋糕中心有淡淡咖啡味，唔太甜，唔膩。呢杯無咖啡因花果茶用嘅係法國茶包，茶包係布做嘅，似乎係貴嘢。初初入口覺得怪味，飲飲吓習慣。我老公話似提子味咳藥水。紙巾都幾靚牆上嘅字，有外國feel今次用咗＄５０現金券，１張咖啡兼迷你蛋糕券，盛惠＄２３７。如果唔係有優惠券我就覺得唔值。