裕興咖啡 (Closed)

由於以前經常都會嚟盛記食晚飯，所以一向對於士丹利街呢炸綠色鐵皮屋排檔有一份情意結，今朝過開嚟中環開會，喺OR搵食見裕與有個花生醬椰菜五香肉丁多士呢個組合咁有違和感，又咁囂張淨係做早市，就把握呢個天九食日既機會喺度咬個老早喇。由於我九點幾先到，大部分港豬都返哂豬場坐監，四五張細圓枱夾埋得十個人賭；坐低諗諗吓得一個餐屎唔敢試嗰個有違和感既組合，都係嗌番啲大路野。尋晚飲完酒，今朝想食啲濕野所以無嗌到三文治，揀咗個五香肉丁炒蛋麵，五香肉丁被撕得細碎，不過份量都唔少，肉丁炒蛋唔係咁多地方有，個蛋都炒得好香。湯底係原著既出前一丁麻油麵，不過佢可能無落哂包粉，有啲淡口。炒蛋同麵中間夾雜大量既椰菜，連鐘意食菜既我都覺得有啲多得滯。杯奶茶我嗌咗少甜都仲係甜得滯，老闆娘見我飲剩一大半問我杯奶茶係咪有問題，我話甜咗啲，佢就前後三四次話即刻整過俾我同叫我下次嗌少甜，唔知係寫漏咗少甜定少甜咗我都覺得太甜呢，不過老闆娘主動關心杯奶茶飲唔哂仲幫你整過呢個舉動都經已令人相當溫暖，下次九星連珠之時可以同胖侶再嚟試吓個花生醬椰菜五香肉丁多士，我估個肉丁炒蛋用嚟襯多士應該會好過襯麵。