同撈同煲 (堅拿道西)

Open Now

Now Closed

一入到去餐廳播緊嘅係六七十年代膾炙人口嘅粵語流行曲，雖然我唔屬於嗰個年代，但係個膾炙程度都令我無一不曉，加上餐廳懷舊嘅裝修風格，絕對值得嗰年代嘅朋友嚟懷緬過去。坐低之後侍應哥哥即刻喺你面前用滾水淥吓啲架撐先，疫下衛生好重要。Hoegaarden，口感順滑，花香清新，打邊爐，最緊要係杯啤酒。麻辣雲耳，雲耳爽身，麻辣味道恰到好處，非常開胃。火焰醉雞煲，侍應放低雞煲之後就會進行呢個點火儀式，好有氣勢，雞肉滑溜，中辣味道令人陶醉。安格斯牛肉，雪花均勻，入口先係油脂嘅香氣，隨後牛味緩緩滲出，喺雞煲嘅醬汁底下得到好好嘅發揮。鴛鴦蚌，用料新鮮，口感爽脆，放入爐內淥一淥就食得。脆炸響鈴，即叫即炸，上到枱都仲係熱辣辣，散發住淡淡嘅蛋味。啫喱，飯後敬送童年回憶遮仔啫喱，只發生喺茶樓仲係推緊點心車嗰個年代。懷舊糖不甩，由於我本身唔好糖不甩所以我求求其其影咗張咁嘅相，但係食落先發覺呢度嘅糖不甩顛覆咗我對糖不甩一貫嘅睇法，呢度嘅花生磨到好碎，我好怕坊間好似隕石咁大粒嘅花生，糖不甩煙靭得嚟好彈，係好彈，顛覆咗我一貫擦膠口感嘅過去，再加上甜度啱啱好同無落我害怕嘅椰絲，我絕對會為咗呢度個糖不甩而再次番兜。