RBTea (Under Renovation)

想當年讀書年代，（有閒錢的時候）總喜歡放左學同班閨蜜去仙跡岩/仙蹤林飲杯珍珠奶茶⋯⋯不過時移勢易，呢2間台式飲品店逐漸被外賣店取代，估唔到多年後仙蹤林又翻生，約左班閨蜜出黎，一於就去呢到緬懷一番！以前係會覺得仙跡岩既飲品係出色d，而仙蹤林就食物好味d，呢間RBTea都係主打食品，不過就無左台式食物，加左西式既意粉、窩夫。早到果2位話勁肚餓，諗住靜靜雞叫左個香腸吐司盒食完我都唔知⋯⋯點知遲到既我黎到個吐司先到，其實都唔係咩吐司盒，都切好左3塊厚吐司，中間刮個窿，fill d白汁落去，普通啦，無乜特別，只係3大塊厚吐司，夠飽肚。我黎到就揀埋d主菜，叫左一款晚餐-香草汁大蝦意粉，因為可以跟餐揀茉香珍珠，跟住就散叫左個焗鴨胸飯同野菌薄脆，講真，個意粉同飯就真係普通野，2個都係淡口味，連焗飯以為有d芝士會香d，都係麻麻地。反而個薄脆就幾香口，多料同埋脆口，但要趁熱食。杯茉香珍珠就有d失望，唔香茶味同埋拎到埋黎都唔夠熱，難道係灌徹以前仙蹤林既飲品質素？呢到唔趕人，夜晚又唔太多人，所以同朋友可以傾一個晚上，不過店員唔多醒目，飲品落單重複左幾次都係落錯，有待改進。