老媽拌麵 (THE FOREST) (Closed)

雖然開返關，但仲未夾到時間去旅行，又好掛住台灣的味道，所以上星期就同老公去食老媽拌麵。我哋係平日中午去食，人流都唔算太多，午餐都幾抵食，有前菜，主菜，仲包指定飲品。前菜有兩舊豆腐，味道真係估佢唔到咁好味，車厘茄連埋個汁都好好味。午餐叫咗個「麻醬手撕雞肉燥飯」，肉燥飯係台灣必食，麻醬手撕雞我最鍾意係夾埋啲蘿蔔絲，青瓜絲一齊食，好 fresh 的感覺。另一款主菜就叫咗「話梅酸汁豬手飯」，豬手超級入味又夠「淋」，冇牙都食到！另外午餐都可以加錢叫小食，我哋叫咗「烤台灣香腸」，呢款係台灣菜必食，記住夾埋蒜片一齊食。另一款小食叫咗「豆乳香香雞」，個豆乳其實係個醬汁，熱辣辣上枱，香香雞脆卜卜超正。飲品老公叫咗「柚子蜜綠茶」，好潤喉。我就加錢轉咗「鳳梨茉莉鮮果茶」，酸酸地好開胃。餐廳環境乾淨又舒適。附上午餐餐牌，午餐都有好多選擇。總結：好有台灣的味道，仲有好多樣嘢想試，下次帶埋仔女可以食多啲。