泰濃麵 (樂道)

Open Now

Now Closed

無得外遊嘅日子特別掛住係泰國嘅日子，特別掛住當地嘅一碗碗船麵，細細一碗但嗦麵嗦起來十分過癮！但其實香港都愈來愈多船麵或泰麵嘅特色小店，今次就嚟到泰濃麵試試，位於尖沙咀區確係方便。麵嘅種類有幾款，我地當然要食地道嘅金邊粉同河粉啦。湯底方面都會揀返船湯同冬陰公湯，船湯就走濃郁路線而冬陰公就酸辣過癮為主。餸就豐儉由人，由肥牛到飛驒和牛都可以揀，仲有海鮮等等，不過我地今日就揀咗黑豚肉同雞髀肉試下。雖然佢地定價唔平但佢地配料都幾多嘅，好似冬陰公湯有蝦、青口等等。黑豚肉片同金邊粉量都幾多，所以一碗都好飽啊！黑豚肉片偏結實口感所以有啲難嚼，我更愛雞髀肉，肉質腍嫩啲。除咗船麵之外，佢地仲有各款小食，蝦餅、芝士雲吞、雞翼等等，我地就即管點咗個小食拼盤試下。好想念嘅蝦餅係船麵小店都能夠食到，新鮮炸起超熱燙，食落又好彈牙，最緊要蘸埋泰式甜辣醬，絕配啊！芝士雲吞好香口，入面都係芝士，甜及咸味交錯。雞翼大大隻，不過不失！食泰菜梗係唔少得青檸梳打，清爽嘅飲品配搭咁先最爽！