8鍋臭臭鍋 (金巴利道) (Closed)

前幾日落雨一個人行下行下有啲肚餓就入咗間餐廳，呢間餐廳主要係一人份打邊爐，入去嗰陣五點幾未到食飯時間，冇乜人，所以冇book到位都好快就有得入座。一坐低侍應就俾咗份Menu我，食物嘅選擇都算多，有九種唔同味道嘅鍋，全部唔同湯底唔同配料，所有餐都配粉絲或飯。Menu背面有小食同飲品。嗰日我就叫咗個蕃茄白豚鍋、荔枝沙冰同埋一個炸花枝丸小食。落左單之後10分鐘內嗰鍋同飲品就嚟咗，火鍋啲配料全部一早擺晒落個鍋度，而粉絲就另上。嗰荔枝沙冰就不過不失。講返食物質素先，番茄湯味道幾濃，亦都有幾個新鮮蕃茄係入面，顯得都幾真材實料，唔似坊間嗰啲咁artificial，齋落茄膏，落粉絲索晒啲湯就好適合。而呢個火鍋主打嘅白豚都唔錯，唔會太肥，亦唔會太老，份量都ok，夠食。除咗白豚外，其他配料主要係蔬菜，有冬菇、蓮藕、粟米、金菇、娃娃菜等等， 份量唔會太多啱啱好。最令人意想不到岀息嘅係嗰炸花枝丸，新鮮炸起熱辣辣，再配埋甜酸醬，絕對係食過翻尋味。食完七點幾，個場都幾full下，埋單唔過二百蚊，有火鍋，有野飲，有小食，都算抵食，有機會行開尖沙咀不坊試下。