The Point - Pizza & Pasta (將軍澳中心) (Closed)

之前見過有一個Pizza嘅排名，呢間排起榜首，所以一直book mark咗想要黎，發覺佢嘅嘢食認真唔錯。意粉黎講平時好少揀貝殼粉，但見好多人揀，於是就試吓。食過就知點解佢會用貝殼粉，佢個汁真係做得好出色，味道好特別，用貝殼粉可以沾咗好多汁，直頭會搶住食，肉粒唔多，肉質軟林都好好食。不過就有一兩粒貝殼粉黐埋咗，煮得唔夠熟硬咗啲。本身最期待個Pizza，上面有好多款唔同嘅海鮮，味道都好特別，不過個人就覺得鹹咗少少，可能係啲醃魚，亦唔鍾意醃魚嘅口感，朋友就覺得好好食。黑松露薯條都推薦，味道好濃郁，芝士同埋黑松露嘅味道唔會互相蓋過對方，兩隻味道都好出，提升咗個脆脆薯條，都係會搶住食嘅一道菜式。本身我係幾鍾意咖啡嘅香味，但係唔係幾鍾意咖啡嘅苦澀。甜品一嚟到，就聞到好香嘅咖啡味，同個雪糕同餅都好夾，一邊食到咖啡味一邊食到甜味，層次豐富。呢間舖頭食嘅味道，會同出面食開嘅味道有啲唔同，但係又會令人鍾意嘅，所以都可以試吓，下次我會再試吓唔同嘅Pizza，相信佢會有我鍾意食嘅Pizza。