辛安東元祖奶奶雞 (Closed)

今晚同朋友嚟到呢間韓式餐廳食晚餐，裝修同餐具具有韓式風格，原本以為鋪頭細細，一眼可以睇晒，但原來餐廳有兩層，上層環境闊落，適合朋友聚餐。我地叫咗佢哋嘅鎮店之寶辛安東元祖奶奶雞（半隻）（$158收加一），兩個女仔share食～呢個奶奶雞用左不同香料燘製而成，可以選擇辣嘅程度，今次我哋選擇咗小辣，醬汁惹味帶點微辣，雞肉好嫩同入味，仲配有不同蔬菜，如薯仔、紅蘿蔔、青瓜、洋蔥等等，蔬菜配料都好淋身入味，可見用咗好多時間烹調而成。底下仲有韓式粉絲，粉絲呈闊條狀，比起一般幼身嘅韓式粉絲更加可以帶到醬汁，食落煙韌彈牙，軟硬適中，配埋奶奶雞非常好食！份量亦都好足夠，原本以為會唔夠食，最後我哋兩個女仔食都可以飽肚離場～