花朝軒 (Closed)

出開西貢，就同好友係碼頭附近食晚餐，約6點半入座，餐廳幾闊落，設計作為中菜館唔會俗氣。一坐低就比了一碟花生🥜（需要$20）同一壺普洱茶。我地揀左海蜇分蹄做前菜，海蜇幾好咬口，味道剛剛好，而分蹄就本身有味，瘦肉分佈比較多。之後再叫左個二人套餐，$428包4款小菜同一碟時蔬。脆皮燒乳鴿味道可以，肉質食落口感都唔錯，外皮炸得脆，可惜我地冇即上即食，少少暖冇熱辣辣食咁好味。豉椒炒蟶子係最惹味既菜式，雖然得2隻，但炒得好香，有紅青椒、豆鼓同洋蔥，零舍好食！蒜蓉粉絲蒸元貝係有2大隻，好新鮮好厚肉，打橫切開左一半黎煮，加埋蒜蓉粉絲一齊食好正。清蒸鮑魚仔又係2大隻，蒸得岩岩好，好咬口，個汁似平時蒸魚既汁，有果皮。是日時蔬係清炒芥蘭，賣相一般，但炒得都夠獲氣。我地另外追加左大蝦配芝士伊麵，芝士味不濃，反而香上湯味，配埋隻蝦，食得好滋味。