富泰家 (Moved) New Location

情人節食食食活動-第一站中午出到旺角....原本係想去某間Cafe嘅....點知自己又傻豬豬唔記得睇開店時間結果摸門釘.....但係又開始肚餓喎.....點算呢....12點幾1點....旺角食肆又未開得晒，又唔想食大型連鎖式經營嘅食店。咁唯有行下女人街啦~俾我見到呢間賣撈麵嘅餐廳。佢地餐牌入面有好多唔同配料嘅撈麵選擇~(因為太肚餓，連餐牌都唔記得左影。)除左撈麵，都仲有飯類架~最後我地揀左【脆皮雞扒芝士撈麵】同【醬燒豬頸肉撈麵】每款撈麵都會有一碗水果奉送。【脆皮雞扒芝士撈麵】一上枱就聞到好香嘅芝士味啦!芝士汁好Creamy~芝士味唔太濃，食落口唔覺得溜，雞扒炸得岩岩好~唔會太乾身!讚!份量亦岩岩好。【醬燒豬頸肉撈麵】店家用咗自家製醬汁，唔會好咸，辣辣地好惹味。怕辣嘅客人可以同侍應講要唔辣。豬頸肉一樣好Juicy，外皮燒得香脆。^^另外一提，店主唔知係咪好中意八哥呢，店內掛左好多八哥嘅相，好得意。