臥龍正宗成都麻辣火鍋 (Closed)

最近天氣終於轉涼，岩哂打邊爐！朋友話有家新開嘅四川麻辣火鍋，帶我去挑戰下食辣！裝修好靚，好強嘅中國風！用上大紅色，又掛哂大紅燈籠，非常有特式。店員一早已經為客人放好圍裙，唔怕整污糟衫褲。仲要圍裙圖案好搞笑咖！每人會有一個大碗預先放咗一啲醬料嘅配料，店員推介如果食得辣可以加火鍋鍋底嘅辣油，就一於試下！我地叫咗鴛鴦鍋，中間係清湯，帶少許杞子紅棗味。周邊係麻辣湯底，一舊舊好似麻雀嘅係辣牛油，非常惹味。手工四寶丸每樣兩款，有豬肉丸，黃牛丸，墨魚丸同蝦丸。手工製法非常彈牙，而且夠新鮮同味道濃郁。咬落保持到肉汁。本地手切黃牛頸脊叫咗份細嘅，肉質粉嫩，帶小許雪花。輕輕淥幾秒，牛肉肉味濃，帶小許咬勁！成都苕粉好似闊嘅薯粉咁，口感煙煙韌韌！吸咗麻辣嘅湯底，辣辣地帶小小麻好食！唔需要煮好耐就已經夠淋同入味。大蜆店員推介是日新鮮海鮮！蜆夠哂大隻，厚肉鮮甜。而且唔會有沙，淥落清湯保持到原有鮮味。萵筍第一次打邊爐食萵筍，吸咗麻辣嘅香味非常惹味！口感帶小小爽口，清清地幾特別！質素不錯，而且裝修特別，係值得一試嘅新店！