廣東茶居 (Closed)

週五跟太太撑吓枱腳，又以尖咀為目的地。前幾次行過海港城，望到開咗幾間新嘢，好有興趣試試...初初入嚟睇到D裝修，諗住又係嗰D騙鬼佬嘅地方，點知...搬咗出嚟住之後冇乜湯水。太太一見到湯就要點。馬上叫個川芎白芷魚雲湯再加老火例湯...湯足料，夠火喉，飲得不亦樂乎。連我呢個唔多鐘意飲湯嘅人都大灌幾碗。飲完後，撑得要死開始對佢哋嘅出品有信心，於是大叫特叫--- 白松露菌油西施帶子，查實即係蛋白炒帶子。蛋白唔算太滑，但帶子味鮮，配合白松露菌油嘅香味，送飯一流；鎮江骨又係另一"送飯王"。醋味濃，但又不過酸；肉係半肥瘦腩排，肉炸得皮脆內軟，相當不俗；金銀蛋豆苗嘅蛋黃粒落得份量足，菜碧綠，夠新鮮；意猶未盡，要整多個擂沙湯丸先夠--- 皮頗煙靱，芝蔴餡尚足，不錯...價錢不貴，可以encore...