大澳德發 (Closed)

在附近做完野，諗住食得清小小，唔使成日打邊爐韓燒。見到地鐵對面有間小菜未試過，就決定試下。入到去發現是主打大澳菜，好特別，平時好少食。店員極力推介個油鹽水北寄貝，話今日精選，所以聽佢話叫左一份。既然來到大澳菜館，我地決定唔食平時食開的小菜，點左啲比較有特色，餐牌上推薦的大澳特色菜。除左北寄貝，仲點左三寶肉餅籠仔蒸飯，大澳小炒，魚湯浸時蔬。北寄貝上台時大份到大家都嘩嘩聲，估唔到$108就食到咁肥美，粒粒都咁飽滿又嫩滑的北寄貝，下面仲墊左粉絲！最後係全部清曬。籠仔蒸飯入面有瀨尿蝦乾，土魷同蝦乾加肉餅。肉餅好滑送飯一流，對面的男士食曬成籠飯。小炒皇比其他小菜館無咁咸，試過好多都落左好多味精，呢間的是真才實料，不過個人喜歡多點腰果。我地都好滿意呢餐，估唔到小菜館又唔太出名竟然有咁高水準，野食完全唔會過分調味，保留左海鮮同海味本身的味道，所有食物都唔會過咸。之後經過呢邊都會再幫襯。