芝心糖人街 (Closed)

九龍城梗係食泰國菜，但鬼屎咁多人，排隊排到肚打鼓，本想食小小野醫下肚，路過呢間甜品店，好光猛乾淨，似乎新開，入去食咗先算，我地見到個餐牌竟然瘋狂咁叫🙈 除咗甜品，仲有小吃，麵食等，一於決定食飽佢，店員推介台灣鹽酥雞，炸漿一D都唔厚，雞肉唔乾又滑，有辣，唔辣選擇，好有台灣feel ,encore 又encore ,一流👍，芝士魚蛋，用咗五種魚打，都算彈牙，巨形恐龍蛋，芝士蛋白流心多士，全都好有創意，味道唔錯，吉列豬扒湯烏冬，豬扒夠大夠厚, 又鬆脆, 餃子雞翼就稍遜，味道唔係好夾，飽咗八成喇，未食甜品呀，食唔食到呢？唯有叫小D喇，芒果脆脆，類似芒果班戟, 將班戟雪凍，跟住炸，外面脆，內面厚厚凍芒果肉，好得意, 可惜要即食，外賣既話個皮就會淋，唔脆，再叫咗芭菲杯share , 賣相好吸引，材料好豐富，有多種生果粒，西瓜，蜜瓜，芒果，小丸子，粟米片，涼粉，仲可揀選雪糕味道，食埋飽哂好滿足，雖然今晚冇食到泰國菜，竟然冇失望，相反大滿足添😋