Pizza Bar (Closed)

係灣仔一帶搵野食，間間都成班鬼佬係度踏到拆天，就係呢間無乜人，就佢啦。落完樓梯，見到樓面真係想返轉頭，咁鬼有十幾二十年前既港產片入面既夜總會Feel既﹖好似一坐低就有個媽咪走出黎﹕「先生貴姓，第一次黎呀...」不過一坐低，望清楚張檯就唔同講法，執得真係乾淨，雖係舊左D，但係保持得好好，連番茄醬樽都唔會有千年跡係樽口度，刀叉杯碟都企理，咁有心，似乎有D希望。既然叫得Pizza Bar，就叫個薄餅黎啦，真係估唔到，好食，餅底夠薄亦夠香，仍然有少少韌性，芝士雖然淡左少少，但片腸又夠鹹到拉番勻D味道，係意想唔到的好水準。其他既野食就不過不失啦，無叫意粉，因為港式餐廳既意粉通常都好得人驚，但就憑個薄餅，都會番轉頭。