飲茶‧私房菜 (南豐大廈) (Closed)

潮流興食趣怪點心，最近XO仔都試咗兩間，並於互聯網上載咗唔少靚相，不少親友睇到都流哂口水。最愛夢遊o既愛麗絲於中環工作，區內都新開咗幾間有得意點心食o既餐廳，上個禮拜終於忍唔住話「想去試飲茶」，仲叫細佬負責訂埋位添。點知到咗約會當日，愛麗絲一家四口遲遲未見，電話一到方才發現大家溝通上有好大o既誤解，佢口中「想去試飲茶」其實係唔記得咗餐廳「X宮小聚」個名，而唔係細佬有意一訪真係叫「飲茶」o既餐店，真係夠哂烏龍，好彩兩間食肆夠近，唔係都唔知點算好。門外o既易拉架所示，「飲茶」除咗有茶飲之外，店內亦設有酒吧區域，歡樂時光傍晚六點至八點更可享買一送一優惠。店名玩味十足，室內o既裝潢都一樣花下不少心思。正門極受小朋友歡迎o既大貨車以「YUM CHA」作牌，車身既為門面，又是廚房，透明度極高。因車門未有上鎖，食客可隨意上車大玩自拍。樓底高高o既店子間格開揚通爽，中午時份雖座無虛席，但聲浪都唔算好嘈吵。點心紙上印有部份菜式o既插圖，不過可能客路比較國際化，餐廳特別為所有餸菜製出精美o既圖冊，令點菜更為容易之餘，等待食物時仲可以慢慢欣賞靚相添！襯托美食o既餐碟上有隻栩栩如生o既立體小錦鯉，確真可愛極！