燒烤堂 (Moved) New Location

燒烤堂喺旺角長沙街呢條橫街，唔算係旺嘅區域。 朋友之前食過話好食，今次就帶我嚟試吓。舖面唔算大，全場滿座，如果想食，記住要訂位。 食煙人仕可在選擇坐出外面。鍾意飲啤酒嘅可以叫生啤，周年優惠買一送一！ 我地主要focus喺野食😚焦糖青蘋果鵝肝多士多士入面有芝士粒，鵝肝夠香脆，加埋青蘋果片大大減低油膩感，正！芝士燒廣島蠔焗完仲好juicy，必食推介！鹽燒Prime牛小排軟腍無根無渣，送酒一流。蜜糖雞中翼算係大隻，蜜糖香甜而不膩。鹽燒赤雞頸肉餐廳推介嘅極嫩滑部份，燒得幾香，但又唔覺得好嫩滑牛油芝士蒜蓉焗雜菇大大份好抵食，半溶芝士加埋蒜蓉醬，勁惹味。昆布湯稻庭烏冬烏冬煙韌彈牙，湯底本來幾清甜，但太咸了。鹽燒豚肉蘆筍卷細細串，一啖食得晒。蜜糖燒菠蘿係新鮮菠蘿，香甜美味。鹽燒豚肉荔枝卷必點推介，荔枝燒完仲好juicy，yummy。最後送左個小甜品 - 焗棉花糖。串燒係即點即燒，要耐心等候架，最啱慢慢食慢慢飲慢慢嘆。