木槿花韓牛專門店 (Closed)

近排煲完套韓劇好想食韓牛，友人推薦呢間餐廳好高質，就去試下。叫左一個厚切韓牛燒烤二人套餐，套餐有前菜沙律、燒烤拼盤、飯同埋甜品。前菜係一口韓國豆腐，豆香味好濃，口感有啲似蜂巢豆腐。另外揀咗韓牛廚師沙律，廚師將蘋果、韓牛同紅棗切成碎條，再淋上芥茉醬，入口味道先甜後有淡淡嘅芥茉味好開胃。燒烤拼盤有厚切肉眼扒、大理石(是日稀有部位)同埋醃牛肋條。侍應可以幫客人燒肉，佢地會先開爐等溫度去到220度先開始燒，話咁樣先會鎖住肉汁食落係最好味。厚切肉眼扒鮮嫩彈牙好juicy，用生菜再加燒烤配料包埋一齊食惹味。大理石韓牛入口油脂感爆發，肉質嫩滑好好食。醃牛肋條味道有啲羶，夾埋泡菜一齊會易入口啲。蔬菜燒得啱啱好，中和下油膩感都唔錯。食完咁多肉，食返個蔬菜石鍋飯中和返。有好多蔬菜配料，加上韓式辣醬撈埋好惹味。最後嘅甜品係泡芙同核桃，食埋成餐好滿足。