得如酒樓 (Closed)

今朝(28-3-2009Sat)同男友一直o係油麻地盪,11點o黎呢o度飲茶啦,上到o黎,唔係好多人,一坐低,就有好耐都未聽過o既糯米雞,於是叫一個,好大個,o衣o家好多酒樓都冇喇.打開佢,嘩!有排骨,竟然有排骨,我由細到大都未食過有排骨o既糯米雞,而佢重有蛋,瘦叉燒,雞翼尖,當然唔少得肥豬肉.食落,糯米入晒味,鹹鹹地,件瘦叉燒唔硬,反而鬆軟,好味.中途,另一架點心車有好多o野食,我o地叫o左蝦餃,食落,嘩!個皮好薄重好靚添呀,而佢充滿蝦餃應有o既香味,係好耐都冇嗅過呢個味道,真係好令人回味.最後,我o地幾經掙扎,終於都叫o左千層糕,放到枱上時,賣相卻唔得,凹凹陷凸,一啲都唔平滑,食落,冇奶黃香,且有粒粒o既蛋黃,呢個唔係幾得啊.環境:好舊式,好舊式,硬板木椅同木裝飾,令我懷念細個時到過o既舊式酒樓.呢餐$49.00.