英記美點小食 (Closed)

帶同事來，是因為他喜歡吃水餃，又愛飲奶茶。來到呢頭，一次過可以滿足佢兩個願望。坐下，像唸急口令一樣，點選了淨水餃、淨雲吞，同埋懷舊撈麵。之後，要進攻檯頭的泡蘿蔔。白蘿蔔依然爽脆，但稍為酸了一點，酸甜度可以平衡得更好。說起泡蘿蔔，同事談到深水埗的劉森記，我則想起灣仔的永華。不消一會，雲吞、水餃亦隨之送上。雲吞細細粒，散尾，可一啖一粒。同事吃過後立即說：「就是幾十年前的味道」。同意，雖然未到四十，但以前細路時在屋村吃的雲吞，著實就是這樣。至於水餃，隻隻飽滿。皮很滑，餡料如木耳絲、豬肉和蝦等，足料，好吃。我平時不太愛吃水餃，但也被此深深吸引住。來到撈麵，放上桌時，陣陣豬油香氣，我一定喜歡。麵條做得爽口，簡單的撈上甜豉油及豬油，已是人間美味。阿姐問：「要唔要牛腩呀?」商議一會，牛腩就唔要了，來一碟牛筋啦！挺大的一碟，牛筋口感最緊要，這裡的腍得來又滿有膠性，而且夠晒入味，有水準。要清碟，無難度。