羊鞍餐廳

Open Now

Now Closed

香港地而家好難再搵到舊式西餐廳。幾經辛苦，喺九龍城比我搵到一間。諗到唔諗，立即飛車去品嚐一下。一入到餐廳，已經有一份懷舊嘅感覺，望吓個Menu，一份親切咁立即湧上心頭。記得細個嘅時候，每次同爸爸媽媽入去餐廳，二話不說，一定唔會叫雜扒，貪佢乜嘢都有。依家人大個咗，唔叫什扒啦，見到個火焰鐵板羊扒餐，立即叫過嚟試吓先，話晒都係餐廳嘅招牌餐呀嘛。侍應送上鐵板餐後，一點火，哇，令童年時嘅畫面，，一幅幅湧上心頭，感動到不得了。切舊羊扒食下，一啲都唔數，肉汁仲好好保存住喺羊扒裏便。好奇心驅使之下，就問問老闆，點解羊扒可以做到咁好食。老闆好誠實咁答我，唔好意思，呢個係商業秘密，唔話得過我知。明白嘅，如果你試過，我好肯定，你都會同我一樣，走去問吓老闆點解可以整羊扒整得咁好食。仲有個羅宋湯，雖然係細細碗，但嗰種濃郁嘅味道，完全保留左我童年時代嘅口味，一路飲，令我想起我爸爸媽媽。還有美味嘅啫喱食添喔！