孖寶車仔麵 (Closed)

今日經過荃灣大霸街去睇吓有咩好食，行行吓見到有間好有舊式香港feel嘅車仔麵店，於是比佢嘅裝修吸引咗入去，門口招牌係發光光管，入面都有好多懷舊香港嘅裝飾。佢地有套餐，3餸一麵送熱飲，加3蚊涷飲，我叫咗牛雜，魚肉春卷，豬腸同粗麵，因為我食得辣，所以加咗孖寶辣汁大辣，麵好快上枱，佢嘅賣相相當吸引，都好大碗，d餸嘅份量都幾多，個湯底好濃好夠味，加埋佢d孖寶辣汁，好惹味。首先講吓豬腸，佢地清得好乾淨，完全冇蘇味，入面肥膏唔會好多，啱晒怕肥又想食豬腸嘅人，佢地鹵得好入味，炆得好淋，一d都唔韌。而魚肉春卷應該係佢自家製，入面d魚肉好鮮味，一d都唔腥，仲好煙韌。佢地d牛雜都好好食，炆得唔會太淋同太韌，好入味。下次食車仔麵，一定會諗起呢間。