The Little Corner (Closed)

頭一次路經呢間雪糕店試下佢既雪糕，已經係兩個月前既事。呢兩個月間，對抺茶雪糕念念不忘，雖然係冬天，但都間唔中再黎食過。第一次食，咁啱同樂園crossover，有樂園奶茶加紅豆味。港式奶茶控當然有試，而亦都真係好香滑，同紅豆十分夾。有茶香，但無茶澀味。老闆話每日都親自去樂園拎貨，可惜只係期間限定。一試忘懷既仲有抺茶雪糕，果次我加左白玉。個人好中意飲奶，店舖主打用大阿蘇牛乳製作雪糕，係香港少見。抺茶雪糕一樣香滑，特別中意牛奶比例不少既雪糕。抺茶味相對奶茶較淡，但亦見突出，唔會俾奶味蓋過。無論價錢、質素，呢間小店絕對比得上幾間有名氣既過江龍或者主打抺茶雪糕既食店有餘。係我心目中，已經榮升為食抺茶雪糕既首選。